لبنى السريعة: اتقي الله فصحة سي زيان

لبنى السريعة تردد أن زيان مريض ونجله علي يقول إن أباه في كامل قواه الجسدية و العقلية والدليل أنه باقي كيعقل على الذهب ديال طاطا فين كاين و كيسلم على لمغاربة واحد بواحد. مندوبية التامك دايرة الواجب و زيادة مع زيان غير باش تسد الأبواب أمام كل المزايدات الكيدية ومانساوش أن زيان jamais ما تشكى من ظروف الاعتقال و منساوش كذلك أن كبير الكذابين المعطي منجب كان شكر ونوه فواحد الخرجة إعلامية بالتحسن الكبير لي عرفاتو ظروف الاعتقال فالسجون المغربية. رغم أن الشهادة ديال منجب لا يعتد بها ولكن فهادي ماكدبش لسبب بسيط أنه دار مزيان مع التامك حيت عارف راسو راجع عندو واحد النهار اللهم يخلي بلاصتو نقية معاه.

نرجعو دابا لسي زيان، كل نهار جريدة “الماحيا” اليومية تخبر الرأي العام بالتدهور المستمر للحالة الصحية ديال زيان، الروماتيزم، هشاشة العظام، التهاب المفاصل ونساو بأن هادي كلها أمراض عادية بالنسبة لشخص في سن الثمانين الله يطول عمرو.

كون يقولو سوء التغذية أو تغدية ملوثة أو أفرشة متسخة أو الحرمان من التطبيب كون جات معاهم و لكن باش يخرجو ديما بنفس الأسطوانة القضية فيها إن.

و فإطار الفدلكة والتدليس، هاديك الجريدة المعلومة (الماحيا اليومية) كتدوي على أمراض ب الكود (code) الطبي ديالها باش زعما تخلع لمغاربة…واحد المرض سماتو WPW وشرحاتو على أساس انه مرض متلازمة التهاب المفاصل…وبلا تفلسيف المغاربة كيعرفو هاد المرض بالبرودة و الروماتيزم. اللهم إلا كان هاد المرض خطير جدا بما أن الجريدة سماتو متلازمة “WPW” وهنا ربما لبنى السريعة عندها الحق حيت هاد WPW لي داير المرض لزيان يقدر يكون فعلا هو متلازمة Wahiba Policwoman Wanted وفهاد الحالة لا التامك ولا الحكومة ولا أمنستي ولا المملكتين المغربية والإسبانية ما يقدرو يديرو شي حاجة لزيان شافاه الله وعافاه.

لبنى السريعة المثل المغربي تيقول الله يقاد العمر مع البصر و كاين مثل آخر تيقول “قلتو كتعمي و كترتو كتزحف” وحنا ما نبغيو ل سي زيان لا العمى ولا الزحاف كما تلمحين في جريدتك. نتمنى تكوني فهمتي.